Consellería de Medio Ambiente, Territorio e Vivenda

Os residuos perigosos:

Considéranse residuos perigosos aqueles que presentan unha ou mais das características definidas no anexo III da Lei 22/2011, do 28 de xullo, de residuos e solos contaminados.

Características dos residuos que permiten clasificalos como perigosos

Dentro da Lista Europea de Residuos considéranse residuos perigosos os que aparecen sinalados con un asterisco (*) á dereita do código.

Almacén de residuos perigosos

Ademais do código LER, a clasificación de residuos perigosos en España está regulada polo código definido no Anexo I do Real Decreto 833/1988, necesario para que un residuo, en calquera momento e circunstancia, estea totalmente identificado.

Este código alfanumérico está composto por 7 bloques, que se corresponden coas 7 táboas do citado real decreto e as súas modificacións. Na táboa seguinte pode consultar a información recollida na codificación dos residuos e a normativa de referencia:

As instalacións de xestión:

Os residuos perigosos son tratados en certos tipos de instalacións en moitos casos co obxectivo principal de reducir a súa perigosidade ou a toxicidade destes. En Galicia existen numerosas empresas autorizadas para realizar actividades de xestión de residuos perigosos. A continuación póñense algúns exemplos de operacións levadas a cabo para o tratamento de residuos perigosos:

• Tratamento de residuos que conteñen disolventes usados mediante operacións de rexeneración para a obtención dun novo disolvente ou de valorización enerxética mediante procesos de incineración ou gasificación.
• Tratamento de residuos de aceites usados, mediante rexeneración para obter de novo aceites, ou ben por procesos de separación e decantación para a obtención dun combustible.
• Descontaminación de vehículos ao final da súa vida útil.
• Tratamento de residuos de aparellos eléctricos e electrónicos que conteñen compoñentes perigosos.
• Tratamento de residuos sanitarios perigosos mediante procesos de esterilización ou desinfección.

Nestas instalacións o almacenamento de residuos perigosos deberá cumprir coas seguintes características, sen prexuízo dos requisitos que, para determinado tipo de residuos ou operacións de xestión veñan esixidos pola súa lexislación específica:

• A zona de almacenamento de residuos perigosos está protexida das inclemencias atmosféricas.
• Deberá contar con soleira impermeabilizada, tanto para a auga como para contaminantes químicos.
• Deberán dispor de sistema de recollida de posibles derrames ou fugas con medidas de seguridade para evitar posibles contaminacións.

Almacenamento de residuos perigosos con cubeto de contención de derramos

• Deberá garantirse que os recipientes de almacenamento, etiquetado e envasado dos residuos cumpren coas seguintes características especificadas nos artigos 13 e 14 do RD 833/1988 e de conformidade coas normas que sexan de aplicación:
• Deberán adoptarse as medidas de protección necesarias para evitar danos á saúde humana e ao medio ambiente.
• O tempo de almacenamento máximo será de 6 meses.

Reutilización de residuos de envases perigosos.

A reutilización de residuos é unha actividade que, se non se realiza correctamente, pode ter unha incidencia negativa no medio.

Para evitalo a Lei 22/2011, do 28 de xullo, de residuos e solos contaminados, prevé dúas medidas: por un lado considera que a actividade de preparación para a reutilización de residuos é unha operación de tratamento e obriga ás empresas que a realicen a obter unha autorización desta administración ambiental; por outro tamén obriga aos produtores destes residuos a entregalos ás empresas que poden xestionalos.

Estas esixencias son especialmente necesarias cando os residuos que se pretenden reutilizar son perigosos, como é o caso dos envases que os contiveron. A limpeza destes colectores para a súa reutilización é unha operación de preparación para a reutilización e sometida a unha autorización.

O incumprimento destas obrigas, ben por quen realiza a actividade sen autorización ou ben de quen entrega o residuo á persoa indebida, son infraccións administrativas que poden ser sancionables.

Esta Dirección Xeral de Calidade Ambiental e Cambio Climático detectou que existen empresas que se dedican a limpar colectores de residuos perigosos e máis concretamente GRG (Gran Recipiente para mercadorías a Granel) en instalacións non autorizadas co risco ambiental que iso supón.

Esta práctica, ademais de non garantir que o residuo se xestione axeitadamente, non exime ao produtor que entrega os colectores baleiros a empresas non autorizadas da súa responsabilidade que se estende aos riscos de derramo durante o transporte e aos derivados da contaminación que a limpeza dos colectores poida ocasionar.

Para asegurarse de que a entrega do residuo se realiza correctamente a unha empresa autorizada, o produtor debe asegurarse de que o receptor do residuo está debidamente acreditado. Para iso pode consultar aquí a relación de empresas que poden retirar os envases que se converteron en residuos. A consulta permite obter en tempo real a localización das empresas autorizadas en Galicia para retirar os envases baleiros. Só ten que cubrir o campo LER co código LER 150110* e o tipo de actividade que realiza o xestor.

Autorizacións para a xestión de residuos perigosos:

Para poder realizar a actividade de tratamento de residuos perigosos o titular deberá solicitar autorización como xestor de residuos perigosos, en concreto, codificando os residuos que se pretenden tratar cos correspondentes códigos da Lista Europea de Residuos e segundo a codificación establecida no Real Decreto 833/1988, do 20 de xullo.

A solicitude de autorización como xestor de residuos perigosos, debe conter a documentación establecida no Decreto 174/2005, do 9 de xuño, polo que se regula o réxime xurídico da produción e xestión de residuos e o Rexistro Xeral de Produtores e Xestores de Residuos de Galicia, e na Lei 22/2011, do 28 de xuño, de residuos e solos contaminados. Se quere consultar o procedemento e a documentación a aportar prema aquí .