Consellería de Medio Ambiente, Territorio e Vivenda

Segundo a Lei 10/2008, do 3 de novembro, de residuos de Galicia, considéranse residuos inertes aqueles residuos non perigosos que non experimentan transformacións físicas, químicas ou biolóxicas significativas. Os residuos inertes non son solubles nin combustibles e non reaccionan física nin quimicamente, nin de ningún outro modo, non son biodegradables e non os afectan negativamente outras materias con que entran en contacto de maneira que poidan dar lugar á contaminación do ambiente ou prexudicar a saúde humana. A lixiviabilidade total, o contido de contaminantes dos residuos e a ecotoxicidade do lixiviado deberán ser insignificantes e, en particular, non deberán supoñer un risco para a calidade das augas superficiais e/ou subterráneas.

Quedan excluídos aos efectos de aplicación destas instrucións os residuos resultantes da prospección, extracción, valorización, eliminación e almacenamento de recursos minerais, así como da explotación de canteiras, no regulado na Lei 22/1973, do 21 de xullo, de minas. Os mesmos regularanse pola súa lexislación específica.

Normas comúns

• As operacións de aproveitamento non se poderán iniciar en tanto o organismo administrativo competente en materia de residuos non resolva a autorización de xestor de valorización, no caso de residuos non perigosos inertes procedentes de RCD's, ou non se pronuncie sobre a viabilidade ambiental da actuación no caso dos residuos inertes de distinta procedencia.
• As operacións de aproveitamento destes residuos poderán realizarse unicamente cando o residuo sexa inerte e adecuado ao uso ao que se destina.
• O organismo administrativo competente en materia de residuos poderá exixir en cada caso, a presentación periódica de analíticas que demostren que o residuo segue a ter o carácter de inerte así como un informe sobre as actividades realizadas.

Actividades

• Aproveitamento dos residuos non perigosos inertes para a súa utilización como recheo de canteira.
• Aproveitamento dos residuos non perigosos inertes en obras de acondicionamento ou recheo ou en restauración de espazos degradados distintos das canteiras.
• Fóra destes supostos a xestión dos residuos inertes debe contar cunha autorización de xestión de residuos de acordo coa normativa xeral establecida no Decreto 174/2005 e normativa sectorial complementaria.

.