Data de publicación: 15.05.2020
Descrición:
O Ministerio para a Transición Ecolóxica e o Reto Demográfico (MITERD) lanza a convocatoria de Axudas Residuos 2020 (PIMA e PEMAR) para promover actuacións de fomento da compostaxe, de recollida separada de aceite de cociña usado para a produción de biocarburante, e de utilización eficiente do biogás.
A Consellería de Medio Ambiente, Territorio e Vivenda exerce de órgano colaborador na tramitación destas axudas estatais, dirixidas a concellos e outras entidades locais (mancomunidades, deputacións, etc.) ou os consorcios constituídos por ditas entidades locais, que teñan asumida a competencia da prestación dos servizos de recollida e/ou tratamento dos residuos municipais.
• Axudas para o fomento da compostaxe:
Estas axudas están enfocadas a impulsar a implantación da recollida separada da fracción orgánica dos residuos municipais e a compostaxe.Os proxectos susceptibles de financiamento son os seguintes:
- Proxectos de recollida separada de biorresiduos para o seu tratamento biolóxico.
- Proxectos de compostaxe doméstica e comunitaria de biorresiduos.
- Proxectos de construción de instalacións de compostaxe destinadas ao tratamento de biorresiduos.
• Recollida separada de aceite de cociña usado:
Os proxectos susceptibles de financiamento son os proxectos de recollida separada de aceite de cociña usado destinado á fabricación de biocarburante.
• Proxectos de biogás:
Estas axudas están enfocadas a incentivar usos de biogás alternativos á queima en fachos ou de xeración eléctrica, así como a cambios en procesos que incrementen a xeración de biogás.Os proxectos susceptibles de financiamento son os seguintes:
- Proxectos de depuración e inxección de biogás na rede.
- Proxectos de depuración e uso en frotas de transporte.
- Proxectos de uso en motores de coxeneración.
- Proxectos de uso de biogás para produción de calor.
- Proxectos de cambio nos procesos destinados a aumentar a xeración de biogás.
Tramitación e financiamento
As entidades locais deberán dirixir a súas solicitudes á Subdirección xeral de Residuos á seguinte dirección de correo electrónico:
residuos.economia.circular@xunta.gal
O prazo para remitir as solicitudes á Subdirección xeral de Residuos remata o 10 de xuño.
Corresponde ao MITERD a valoración das propostas e a distribución dos fondos entre os proxectos presentados. Solo se aceptarán os proxectos que cumpran cos requisitos establecidos nas bases da convocatoria. A orde de prioridade e as contías máximas de financiamento dos proxectos establécese nas mesmas bases en función da tipoloxía do proxecto e, no seu caso, da poboación de dereito en 2019.